Kontratu Fahe Produsaun (KFP) TL-SO-22-23 ne’ebé opera husi Eni Timor 22-23 B.V. ho nia parseiru TIMOR GAP PSC TL-SO-22-23 Unipessoal Limitada, konklui ou remata ona akizisaun dadus 3D no 2D Sismiku iha sira-nia área kontratu. Kompromisu ba akizisaun Sismiku 3D no 2D ne’e hanesan parte ida husi Programa Serbisu 2026 ne’ebé aprova ona ho área kobertura hamutuk 1.500 kilómetru kuadradu ba 3D no 50 kilómetru kuadradu ba 2D.
Autoridade Nasional Petróleu (ANP) rasik hafoin hala’o tiha avaliasaun ba dokumentus sira hotu ne’ebé presiza ba akizisaun sísmika, emite aprovasaun ba akizisaun dadus sísmiku 3D no 2D iha loron 19 fulan Marsu tinan 2026. Durante semana dahuluk fulan Juñu 2026 nia laran, Eni atinji no kompleta ona akizisaun ba dadus 3D ho área kobertura hamutuk 1.535 kilómetru kuadradu, no dadus 2D ho área kobertura hamutuk 60 kilómetru kuadradu, ne’ebé ultrapassa liu kompromisu mínimu ne’ebé aprova ona.
Aleinde ne’e, peskija sísmiku ne’e rasik hala’o tuir padraun saúde, seguransa no regulamentu ambientál ne’ebé aprova ona husi ANP. Projeitu ne’e mós remata ona no laiha akontesementu asidente ruma, eseptu identifika deit ró peska ilegál, no ekipamentu agregasaun peska ne’ebé konsideradu hanesan lixu iha tasi.
Depois de remata tiha akizisaun 3D Sísmiku, Eni sei hala’o prosesamentu no interpretasaun ba dadus 3D no 2D Sísmiku no ikus liu sei halo perfurasaun ba posu esplorasaun ida, ne’ebé tuir planu sei realiza iha tinan 2027 nia laran.
Karik iha perguntas ruma, halo favor bele haruka email ba ANP liu husi enderesu anp.publicinquiry@anp.tl
