Autoridade Nacional do Petróleo (ANP) ho kontente anunsia katak ANP susesu partisipa iha eventu Energy Council 2026, ne’ebé realiza iha Singapura iha loron 9 no 10 Juñu 2026 iha Hotel Pan Pacific. Eventu ne’e atende mós autoridade governamentál sénior, lider indústria, investidor sira no peritu enérjia husi mundu tomak hodi diskute kona-ba futuru setór enérjia global no oportunidade investimentu.
Durante eventu ne’e, ekipa ANP ne’ebé kompostu husi Departamentu Peskija no Dezenvolvimentu hamutuk ho Departamentu Konteúdu Lokal no Relasaun Parseria partisipa ativamente iha diskusaun no enkontru ho kompañia internasionál mina no gás, investidor sira no parseria estratéjiku atu promove setór petróoleum upstream Timor-Leste nian no hatudu komitmentu nasaun nian atu kria ambiente investimentu ne’ebé estável, transparente no kompetitivu.
Aleinde ne’e, reprezentante ekipa ANP hanesan mós Diretor Ezekutivu ba Peskija no Dezenvolvimentu, Sr. Francelino A. X. Conceição, partisipa iha diskusaun nivel alto, enkontru bilateral no sesaun networking, inklui painel diskusaun ho tema “Pragmatic Energy Future” no mós aprezentasaun kona-ba “Timor-Leste Emerging Market Update”. Enkuantu, Vice-Prezidente ANP, Sr. Quintino Pereira Bere, hato’o liafuan boas-vindas iha Timor-Leste Private Luncheon no mós sai hanesan konvidadu onra atu entrega prémiu iha jantar atribuisaun prémiu Energy Council.
Eventu ne’e fornese plataforma importante ida ba ANP atu atualiza kona-ba oportunidade setór petróleu Timor-Leste nian, enkuadramentu jurídiku ne’ebé vigor no esforsu kontinua sira atu atrai investimentu responsavel ba setór enérjia nasaun nian.
Aleinde partisipa iha konferénsia ne’e, ANP mós organiza Timor-Leste Private Luncheon ka Almosu Privadu ida iha Energy Council 2026, ne’ebé sai hanesan plataforma importante atu hametin relasaun no envolvimentu entre Governu Timor-Leste, lider indústria, investidor sira no parseiru estratéjiku hosi setór enérjia global. Organizasaun eventu eksklusivu ida ne’e hatudu komitmentu Timor-Leste nian atu promove diálogu konstrutivu, promove oportunidade investimentu no hatudu potensial enérjia boot ne’ebé nasaun ne’e iha.
Iha Private Luncheon ne’e mós oferese oportunidade importante ida atu aprezenta dezenvolvimentu foun sira iha setór petróleu, hatudu visaun Governu nian kona-ba dezenvolvimentu sustentável ba rekursu naturál sira no aumenta konfiansa investidor sira ne’ebé dadaun iha ona no sira ne’ebé sei konsidera atu investe iha Timor-Leste.
Partisipasaun ANP nian iha Energy Council 2026 mós sai hanesan plataforma valiozu ida atu hametin relasaun ho parseiru indústria sira ne’ebé eziste ona no estabelese ligasaun foun ho investidor no operadór potensial sira ne’ebé interesadu atu buka oportunidade iha Timor-Leste. Nune’e mós, ANP konsidera nia envolvimentu iha eventu ne’e hanesan susesu boot ida ne’ebé reforsa pozisaun Timor-Leste nian nu’udar destinasaun emerjente ba investimentu iha setór enérjia no hatudu komitmentu nasaun nian atu dezenvolve nia rekursu petróleu ba benefísiu tempu naruk ba nasaun no povu tomak.
Ikusliu, ANP hato’o nia agradesimentu ba organizadór Energy Council 2026 no parseria hotu-hotu ne’ebé halo envolvimentu ho delegasaun Timor-Leste durante eventu ne’e. Diskusaun no relasaun sira ne’ebé estabelese durante konferénsia ne’e espera atu kontribui positivamente ba kolaborasaun no oportunidade investimentu sira iha futuru ba setór enéerjia Timor-Leste nian.
