KOMUNIKADU IMPRENSA
Dili, Timor-Leste, 13 Outubru 2025 – Timor-Leste Australia Energy Partnership (TLAEP) haksolok tebes hodi anunsia lansamentu Programa Formasaun Formador (ToT) ba treinador soldadura, inisiativa ida-ne’ebé dezeña atu hasa’e edukasaun profisionál no abilidade téknika espesifikamente iha setór enerjia ne’ebé kontinua aumenta ba bebeik iha Timor-Leste nia laran, no jeralmente indústria estrativa. Programa inovativu ida-ne’e hanesan esforsu kolaborativu ida entre Departamentu Industria, Siensia no Rekursu Governu Australia nian (DISR) no Autoridade Nacional do Petróleu I.P. (ANP).
Programa TLAEP ne’ebé sei hala’o iha Sentru Nasionál ba Empregu no Formasaun Profisionál (CNEFP) iha Tibar, Liquiça, ho objetivu atu eleva padraun formasaun profisionál iha Timor-Leste. Formadór kualifikadu na’in sanulu (10) hosi sentru formasaun no universidade profisionál oioin, ne’ebé hetan akreditasaun hosi Instituto Nacional De Desenvolvimento De Mão-de-Obra (INDMO), sei hola parte iha inisiativa ida-ne’e. Instituisaun no Universidade sira ne’ebé partisipa mak hanesan: CNEFP Tibar Liquiça; CNEFP Bansone, RAEOA; CNEFP Becora, Dili; STM Becora, Dili; Dom Bosco Comoro, Dili; Dom Bosco Fatumaca, Baucau; ESTV Maumali, Maliana; ESTV 1 de Lospalos; ESTV Becora, Dili; ETI, Dili; no UNTL. Formadór sira-ne’e sei hetan abilidade nesesáriu sira atu fornese instrusaun soldadura vokasionál ho kualidade aas, hodi fó kbiit ba sira atu fó sai sertifikadu soldadura nian ne’ebé rekoñesidu iha internasionál. Esforsu ida-ne’e importante tebes atu dezenvolve forsa traballu ne’ebé kualifikadu no kompetitivu, asegura seguransa no kualidade projetu infraestrutura enerjétika, no promove kapasidade lokál no auto-sufisiénsia iha Timor-Leste.
Treinamentu ne’e sei hala’o iha loron 13-23 fulan-Outubru tinan 2025, ho sesaun finál ne’ebé planeia ona ba loron 22-27 fulan-Novembru tinan 2025. Sesaun treinamentu ne’e sei lidera hosi Sr. Joseph Sandor, Treinadór Prinsipál ba Teknolojia Soldadura nian hosi Weld Australia, órgaun prinsipál ne’ebé reprezenta indústria soldadura nian iha Australia. Weld Australia fornese servisu formasaun, kualifikasaun, no sertifikasaun ne’ebé komprensivu no rekoñesidu hanesan Órgaun Nasionál Autorizadu (ONA) no Órgaun Formasaun Autorizadu (OFA) hosi Institutu Internasionál Soldadura nian (IIS).
Inisiativa ida-ne’e marka momentu importante ida iha dedikasaun TLAEP nian ne’ebé kontinua atu dezenvolve edukasaun vokasionál no hasa’e abilidade téknika ne’ebé importante ba kresimentu setór enerjia nian. Liu husi kolaborasaun ho CNFP Tibar no INDMO, TLAEP ninia objetivu mak atu implementa programa inovador ida-ne’e, hodi ko’alia liu kona-ba vizaun ne’ebé fahe ba malu atu haforsa forsa traballu ho abilidade nesesáriu ba progresu indústria nian.
Parseria Enerjétika Timor-Leste Austrália (TLAEP) hanesan inisiativa konjunta ida ne’ebé lidera hosi Departamentu Indústria, Siénsia no Rekursu (DISR) Governu Austrália nian no Autoridade Nacional do Petróleo I.P. (ANP). Remata
