Komunikadu Imprensa
Dili, 08 Outobru 2025
Autoridade Nacional do Petróleo (ANP) Timor-Leste ho kontente hakarak anunsia ba publiku kona ba asinatura Eskritura Novasaun, Asunsaun no Deskarga kona-ba Kontratu Fahe Produsaun PSC-TL-SO-T 19-11.
ANP rasik reprezenta Ministériu Petróleu no Rekursu Minerais(MPRM) asina Eskritura ida ne’e ho Finder Timor-Leste B.V. (Operador) núdar kompañia ne’ebé inkorpora ona tuir lei Olanda, Finder PSC 19-11 Pty Ltd (Assignor) no TIMOR GAP PSC 11-106 Unipessoal, Limitada (TIMOR GAP), núdar kompañia subsidiáriu husi TIMOR GAP, E.P iha Segunda 6 Outubru 2025.
Hanesan haktuir ona iha eskritura ne’e rasik, no mos bazeia ba direitu partisipasaun husi Estadu Timor-Leste nian ne’ebé prevé ona tuir Lei ne’ebé iha, TIMOR GAP aumenta no sosa partisipasaun ho pursentu sanulu (10%) husi Finder PSC 19-11 Pty, Ltd.
Ho nune’e, automatikamente TIMOR GAP ninian interesse iha partisipasaun sae husi pursentu rua-nulu-resin-há’at (24%) ba pursentu tolunulu-resin-haat (34%) iha PSC TL-SO-T 19-11 nia laran.
PSC TL-SO-T 19-11 ne’e rasik koñesidu ho naran PSC JPDA 11-106 molok ratifikan ba iha fronteira mar’itima, ne’ebé hetan operatorship husi Eni JPDA 11-106 BV. PSC nemos hetan mudansa iha operasaun no operatorship ne’ebé’e formaliza liu-husi akordu fa’an no sosa ne’ebé rezulta Finder Energy Pty Ltd ofisialmente nomeia sai hanesan operador ba PSC iha loron 6 fulansetembru tinan 2024. Totál área husi kontratu ba PSC ne’e rasik hamutuk 662 kilómetru kuadradu, no lokaliza besik ba kampu Kitan iha área tasi Timor-Leste nian.
Bazeia ba PSC TL-SO-T 19-11 Finder Timor-Leste B.V ho ninian parseiru TIMOR GAP, iha kompromisu tomak ba programa servisu, ne’ebé sei hahú dahuluk no klean kona-ba reprosessamentu ba dadus sísmiku Ikan 3D 2005, sertifikasaun ba rekursusestudu konseitu dezenvolvimentu, no planu kontijente ba dadus 3D sísmiku foun, planeamentu posus no desizaun finál ba dezenvolvimentu kampu ne’ebé planeia ona atu realiza iha tinan 2027 nia laran.
Serimónia asinatura ida-ne’e marka mos pasu ida-ne’ebé signifikante tebes, hodi loke dalan ba kolaborasaun ida-ne’ebé di’ak liu tan entre Governu Timor-Leste no Finder Timor-Leste B.V. hodi bele esplora rekursu petróleu no gás iha área jurisdisaun Timor-Leste nian no promove dezenvolvimentu indústria mina no gás iha tempu badak nia laran. **Ramata**
